Þriðji í aðventu

Bara að rapportera að hér sitjum við Guðbrandur Erlingur (a.ka. Lingur, Brandur, Eldibrandur, Miltisbrandur (ef hann gerir eitthvað af sér, sem er fátítt)), ein heima, og erum að pakka inn jólagjöfum.  Hann er þó mest í að skoða í pokana og elta afklippur af jólapappír og er svona frekar slakur í innpökkuninni.  En við höfum það bara bærilega jólalegt takk fyrir!  Við hlustum á jólamúsík og erum með oggupons rautt í glasi, þó ekki kisi, og höfum það fínt í einverunni.  Hafið það gott í kvöld!

Þvottahjal...

Það eru blendnar og undursamlegar tilfinningar þegar maður er að þrífa filterinn á þurrkaranum sínum og finnur miða þar sem stendur á "Hand Wash Only"!  Fyrir það fyrsta er augljóst að viðkomandi hlutur hefur farið í þvottavélina í fyrsta lagi og í þurrkarann að því loknu og á sér greinilega ekki viðreisnar von úr þessu.  Verst er þó að ég hef ekki hugmynd um af hvaða plaggi þetta er.

Leiðinlegasta heimilsstarfið?  Brjóta saman #$%#$%# þvott.

Einkennilegur þankagangur

Sáuð þið fréttina um að íslenska ríkið ætli að leggja fram 220 milljónir til skólamáltíða í Afríku næstu tvö árin?  Og sáuð þið líka fréttina um fátækt á Íslandi og um fólkið sem hefur ekki efni á að senda börnin sín með nesti í skólann?  Fátæk börn á Íslandi eru víst um 5.000 stk. 

Einhvern veginn finnst mér að stjórnvöld ættu að líta sér nær og bjóða íslenskum börnum upp á máltíðir áður en hafist er handa við svona verkefni.  Við erum meira að segja það efnað þjóðfélag að við gætum gert bæði, boðið öllum börnum upp á næringu í skólanum OG styrkt skólabörn í Afríku.  Er þetta ekki tilvalið til að minnka ójöfnuð í þjóðfélaginu og búa til betra fólk?

Neyðarhemillinn brúkaður.

Frúin neyddist til að taka hlé á störfum sínum í dag og þurfti talsvert til.  Ég er nefnilega seinþreytt til vandræða hvað veikindi varðar og fer frekar í vinnuna en að hanga heima í sófanum.  Að sjálfsögðu hlýði ég ef pestin er meiriháttar og í dag lít ég út eins og ég hafi verið lamin í bæði augun.  Fékk nefnilega þessa hrottalegu augnsýkingu og er búin að vera að bera fúkkalyf (sem gera mig hálfblinda) í augun í sólarhring.  Það skal viðurkennast að ég er búin að ganga dálítið fram af mér í haust enda mikið að gera á stóru heimili og vinnustað.  Stundum barasta tekur líkaminn málin í sínar hendur og segir manni að stoppa oggulitla stund.  Point taken!

Valgerður var ógurlega góð við móður sína, fór út í búð og keypti skonsur og góðgæti, kom til baka og lagði á borð, kveikti á kerti og kallaða á mig að borða.  Yndisleg stúlka!

Guðrún Björk (a.k.a. Mary Poppins) á afmæli í dag.  Æðislega geggæðislega og magnaðar afmælisóskir berast henni héðan úr Kópavoginum.

Annar í aðventu!

Hér blogga ég aftur sama daginn en ég bara varð að stæra mig af því að hafa búið til aðventukrans.  Já, ég byrjaði víst á honum fyrir viku síðan en kláraði ekki fyrr en nú.  En þetta er allt í lagi því við Helga systir mín erum búnar að sammælast um að svissa yfir í Georg Jensen við fyrsta tækifæri.  Í það minnsta þangað til maður hefur meiri tíma til að föndra við svona hluti.  Eða ekki.

By the by, þá sést líka nýja borðstofuborðið sem við Siggi pússuðum upp og olíubárum af miklum þrótti.  Fallegt ekki satt?  Og passar við Jacobsen....

 

 

Jólapælingar

Okkur að óvörum varð dagurinn í gær hinn jólalegasti þrátt fyrir að menn hafi ekki verið beint stemmdir þannig til að byrja með.

Við skruppum til Lilju og Braga í jóla "brunch", mættum að vísu seint því kallurinn var svo upptekinn í vinnunni.  Það var fín heimsókn og Hulda var nú á því að við ættum ekkert að fara því það var svo mikið af skemmtilegu dóti þarna.

Þegar heim var komið ákvað ég að bjarga verðmætum frá glötun en sú aðgerð fólst í því að rúlla tveimur jólamyndum sem teknar voru upp á VHS fyrir 11 árum, inn á harða diskinn á DVD græjunni.  Það er skemmst frá því að segja að við Valgerður vorum límdar yfir sjónvarpinu í nokkra tíma.  Fyrst horfðum við á "It's a wonderful life" og svo á "Muppet Christmas Carol".  Á meðan kom stormur, snjófjúk og reyndar seinna meir, rigning úti og þetta var bara alveg æðislegt.Eftir matinn límdi familían sig aftur í sófana og við borðuðum eplaböku og horfðum á Elf.  Fínt kvöld.

Þess ber að geta að önnur störf fóru líka fram á heimilinu þrátt fyrir sjónvarpsgláp þótt hreingerningastormurinn hafi fengið að bíða aðeins.

En að öðrum málum, þó tengdum.  Ég barasta næ ekki þessu svarta jólaskrauti sem er vaðandi uppi um allt núna.  Finnst það kuldalegt og ekki baun jólalegt.  Og þeir sem mig þekkja, vita að ég og svarti liturinn höfum átt mikla og góða samleið í gegnum árin.  Man reyndar eftir því að ég bjó til aðventukrans með svörtum og dumbrauðum borðum svona í byrjun sambúðar þegar gotharinn var meira ráðandi í mér.  Mömmu þótti þetta nú síðasta sort en ég held samt að kransinn hafi verið ögn jólalegri en svarta dótið sem er núna í gangi.  Kannski var ég barasta 17 árum á undan minni samtíð?  Svo finnst mér líka merkilegt að sjá jólaskraut úr burstuðu áli og stáli, svona minimalískt.  Mér finnst bara svona "smekkleg" og "stílhrein" jól vera þverstæða.  Það var eiginlega útséð með það um leið og vitringarnir mættu með sínar jólagjafir á svæðið, gull, reykelsi og myrru.  Ekki beint minimalískt, eða hvað?

 

Álitsgjafar hinna fullkomnu jóla.

Ég bendi einlægum aðdáendum síðunnar að ég þjáist ekki af bloggleti heldur eru núna að koma jól og ég vinn við þjónustu og verslunarstörf að þjóna stressuðum Íslendingum og kúnnum sem fá kikk út úr því að hella sér yfir mann.  Merkilegt, en ég man ekki eftir því eftir að hafa verið stressuð fyrir jólin fyrr en ég fór að vinna á núverandi vinnustað.  Það er semsagt annað fólk sem leggur það til.  En þetta þýðir að ég er að kafna úr þreytu og stressi þegar ég kem heim og kveiki ekki mikið á tölvunni.  Restin af lífinu stoppar nefnilega ekki á meðan Íslendingar undirbúa jólin, maður þarf líka að sinna börnunum, þvottinum, tiltektum, mat og fleira þannig að ákveðnir hlutir barasta sitja á hakanum.  Og svo má ekki gleyma að það er fötluð lítil stelpa á heimilinu, sem mætir núna í ýmsa aukatíma og foreldrarnir með og að auki þarf að hafa vakandi auga með henni á öllum stundum.  Ég man að ég fékk netta athugasemd í fyrra um skort á jólakortum...sorrí, það eru svona hlutir sem fá að fjúka þegar mikið er að gera.  Snemmtæk íhlutun hefur forgang á pappaspjöld með jólasveinum.

Siggi heyrði reyndar í konu í útvarpinu um daginn sem lýsti skoðun sinni á því þegar fjölmiðlar og jólapúristar eru að siða fólk til í desember.  Menn eiga ekki að vera stressaðir, ekki að gera of mikið, ekki hlaupa í búðum, endilega sækja jólatónleika, kveikja á kertum, gera kökur, handgerð jólakort og fleira.  Sama kona skildi nefnilega ekkert í því af hverju það þætti þá svona slæmt að byrja að útbúa jólin snemma!  Prógrammið er orðið jafnstrangt og hjá ömmum okkar sem gerðu jólahreingerningu, bökuðu, saumuðu jólafötin og gerðu allt sjálfar.  En núna er þetta í nafni þess að "slappa af" og "hafa það huggulegt".  En það gleymist í öllu orðagjálfrinu að þetta bætist ofan á fulla vinnu og oft nám hjá fólki.  Og allt á að gera á þessum þremur vikum sem eru frá byrjun desember/aðventu.  Það eru yfirleitt konur sem setja sér svona vonlausa dagskrá.  Og svo þegar menn koksa á hinum fullkomnu jólum, hlýtur ósigurinn að vera hrikalegur.  Ekki gott fyrir sálarlífið. 

Ég hef enga lausn á þessu máli, bara það að anda með nefinu, redda því sem hægt er að redda og eiga smá jólabjór í kælinum þegar maður kemur heim með (jóla)öndina í hálsinum.  Og feisa það að maður getur ekki gert "allt", hvað sem það á nú eiginlega að vera.  Ég hins vegar kveiki á kertum árið um kring og breyti því ekkert sérstaklega í desember.  Umfram allt, loka eyrunum þegar álitsgjafar hinna fullkomnu jóla fara að jarma í fjölmiðlunum.  Og setja dagblöðin sem birta svona þvætting undir kattasandinn í kattadallinum (þið sem eigið ketti), það er rétti staðurinn fyrir svona hluti.  En hins vegar ætla ég að lumma upp fullt af jólaskrauti og ljósum og það verður til þess að gleðja börnin mín.  Það finnst mér vera forgangsatriði.  Það verður ábyggilega svona Suðurnesjastemning á húsinu en hvað með það...

En....ég vona að þið eigið góða aðventu með hæfilega miklu að gera og verið góð við fólk í verslunar og þjónustustörfum.  Annars er mér og VR að mæta.  (Við mætum með heftara, teip, skiptimynt í rúllum og gamla reikninga til að hrella jóladóna!)

P.S.  Fór með strákunum úr vinnunni að spila pool í gærkvöldi.  Fyrsta sinn sem ég munda svoleiðis kjuða á ævinni og það var feiknalega gaman.  Mun leitast við að endurtaka það sem fyrst.  Hver vill spila? 

 

ÞAU UNNU!

Ég er þvílíkt að rifna úr monti og stolti núna að það hálfa væri nóg.

Valgerður semsagt tók þátt í First Lego League keppninni í dag.  Ég skrapp niður í Öskju í hádeginu og horfði á þau flytja kynninguna sína.  Fyrir mína parta var það aldeilis fínt og glæsilegt, þau eru búin að standa sig með þvílíkum sóma í störfum sínum að það dugði alveg prýðilega.  Verðlaun væru jú bónus en ekki atriði í sjálfu sér.

Svo fór ég heim en fylgdist með verðalaunaafhendingunni í gegnum netið.  Þau unnu ekki fyrir rannsóknarverkefnið og svo voru veitt hin og þessi verðlaun en ekkert var að gerast.  Svo komu næst síðustu verðlaun, besti bíll í braut minnir mig að það heiti, og þá unnu þau!  En svo voru aðalverðlaunin og haldið að þau hafi ekki barasta unnið þau líka!!!  Ég var með Sigga í símanum á meðan þetta var lesið upp og foreldrarnir eru alveg að tapa sér af stolti yfir vísindanördinum okkar.

Hér er heimasíða Nanóveranna sem er það sem liðið heitir.  Fullt af skemmtilegum myndum og lesningu.

Og svo segir maður barasta: HIP HIP!  HÚRRA! HIP HIP!  HÚRRA! HIP HIP!  HÚRRAAAAA!

Nanómóment í tölvunni!

Sloppin í tölvuna, loksins!  Eiginmaðurinn er að svæfa ungann svo ég hef sjaldgæfar fimmtán mínútur til að deila rausi mínu með blogglesendum.  Hífandi rok úti og gatan mín stendur víst ekki undir nafni í dag.  En það er búið að taka allt lauslegt inn frá því í síðasta óveðri og tjóðra grillið fast þannig að við erum bara róleg í rokinu.

Er komin á það stig í vinnunni að ég sé ekki fram úr því sem ég er að gera og geri ekki ráð fyrir að það ástand batni fyrr en síðasta vinnudag fyrir jól!  Þá er spurning um að gera eins og var talað um í Fóstbræðrum: Kveikja á kerti, því maður er orðinn allt of stressaður!

 Við vorum talsvert á ferðinni síðustu helgi, hjálpuðum tengdamömmu að halda afmæliskaffi og tókum svo til eftir herlegheitin.  Á sunnudeginum heimsóttum við svo Lilju, Braga, Daníel og litla kút.  Myndarlegur snáði mættur í heiminn þar.  Um kvöldið var svo nautasteik hjá Gísla mági mínum í tilefni afmælis hans.  Hulda stóð sig vel báða dagana sem pakkaupprífari en það tókst þó að gefa Daníel og litla bróður hans pakka án þess að Hulda tæki athafnirnar að sér.  Skemmtileg helgi en það skal viðurkennast að það verður dálítið rót á mannskapnum þegar við náum ekki að borða heima yfir helgina. 

Vikan hefur annars verið annasöm og ég barasta skil ekki hvert tíminn fer, mér líður enn eins og það sé mánudagur.

Valgerður er á fullu að undirbúa sig fyrir Legokeppnina á laugardaginn.  Hún er ekki að föndra við kubbana í þetta sinn en er að undirbúa rannsóknarverkefni um nanótækni og fleira gott.  Við höfum lítið séð hana, því hún ýmist hangir í skólanum eða heima hjá vinkonu sinni að fikta í vísindum!  Þvílíkir vandræðaunglingar!  Í fyrra unnu þær til verðlauna fyrir verkefnið sitt og við bara óskum henni góðs gengis í þessari atrennu.

Fróðlegt að sjá "þjóðernishyggjufólkið" koma skríðandi út úr skápnum, núna þegar frjálslyndir segjast vera með málefnalega umræðu um innflytjendur.  Ég er nokkuð viss og sýnist það líka á þeim viðtölum sem eru tekin við suma samborgarana, að skoðanirnar sem eru viðraðar eru  byggðar ekki á málefnalegum grunni.

Ef ég færi að agnúast út í útlendinga þyrftum við Siggi að hætta að tala við svo til alla vini okkar og jafnframt að hafa skömm á þeim pörtum í okkur sem við getum rakið til erlendra forfeðra okkar.  Það er víst Fransmaður sem lokkaði einhverja formóður Sigga í bólið og ég á víst forföður af gyðingaættum sem kom hingað frá meginlandi Evrópu.  Svo gætum við farið að skammast út í írska upprunann og svei mér þá ef við erum ekki komin af Norsurum líka!  Dear oh dear!  Við erum líklega öll komin af innflytjendum!

Eins er það merkilegt að sumir Íslendingar telja sig mega búa og vinna alls staðar en geta ekki umborið að aðrir komi hingað!  Það verður að taka á þessu strax og kannski er ágætt að þetta hafi fengið að koma upp á yfirborðið í stað þess að krauma undir niðri og skemma kannski meira en orðið er.

Núna streyma inn prófkjörsauglýsingar og alls konar lið sendir manni SMS og hringir til að biðja um stuðning.  Held mér hafi tekist að móðga einhverja ágæta konu sem hringdi fyrir hönd ágæts manns sem er í framboði.  Ég semsagt glopraði því út úr mér að ég hefði ekki hugmynd um hvaða maður þetta væri og svei mér þá ef henni sárnaði ekki að ég skyldi ekki þekkja svona mætan Kópavogsbúa!   Svona er að trufla maddömuna þegar hún er í sumarbústað með rauðvínsglas í hendi, kallinn í sófanum og að hlusta á Django!  Síðan þá hefur birst slatti af myndum af náunganum í blöðunum.  Það er eins og sumir haldi að mynd sé nóg til að gera þá fýsilega til stjórnmálaþáttöku. Takk, en nei takk.  Það er reyndar efni í heila ritgerð að stúdera auglýsingar, greinaskrif og almennt hvernig liðið kynnir sig þessa dagana en það verður ekki gert núna.

Já, ég sá Mýrina í gær.  Ágæt mynd, algjörlega hægt að horfa á hana og hún er prýðilega aðhæfð kvikmyndaforminu.  Tvö oggulítil feilspor í henni en engin er víst fullkominn, ekki einu sinni ég!

Góðar stundir

Hversu langt á að ganga?

Núna finnst mér ástæða til að vekja athygli manna á málflutningi Frjálslynda flokksins og þá sérstaklega hugmyndum Magnúsar Þórs Hafsteinssonar á innflytjendamálum.  Er ekki ansi langt seilst þegar þú þarft að sækja fylgið í sjálfhverfa hvíta klúbbínn?  Hvað með að flytja bara inn "kristna norðurlandabúa"?  Hvað með að takmarka innflutning á múhameðstrúarfólki.  Hvernig væri nú að leggja niður fúkkalyf, augnlinsur og getnaðarvarnir, while we're at it?  Fólkið sem að tekur að sér verkin sem Íslendingar eru of fínir fyrir (og gerir oft miklu betur!) á ekki þetta bull skilið!

Sorry maður, þessar hugmyndir runnu út á sama tíma (hugsanlega fyrr) og Nürnberg réttarhöldin urðu móðins. 

Þau hljóta að hafa betri hugmyndir til að afla sér fylgis....