Komin aftur...

Bara að láta vita að ég er hér ennþá.  Ég er ekki beinlínis búin að vera í banastuði undanfarna viku en er öll að hjarna við núna.  Eiginmaðurinn tók sér líka fáheyrt frí á laugardegi til að aðstoða á heimilinu því húsfrúin var ekki alveg í stakk búin.  Svo nú eru blómin búin að fá að drekka, búið að þrífa meira og við tæmdum fataskápa af óþarfa og röðuðum því litla sem eftir var.  Rauði Krossinn fékk helling.  Að vísu heyktist ég á að flokka smábarnafötin til fullnustu og varð bara meyr svo það var látið duga að taka þau úr skápnum hennar Huldu og ég mun klára það verk þegar ég er orðin hraustari.  En í vinnunni var smá smit frá bilanaflensunni hér heima því hljóðtölvan mín varð lasin, móðurborðið lést semsagt.  Þegar ég fór á föstudaginn var þó búið að fá nýtt og verið var að blása lífi í sjúklinginn.  Bræðurnir hafa líka lent í tækniklandri því ADSLið hjá þeim hefur verið í klúðri og þeir koma reglulega og fá að brúka tölvu og tengingu.

Við skruppum svo í Byko í dag í Kauptúni og ráfuðum um eins og týndir sauðir.  Ég hafði þó af að kaupa tappa í eldhúsvaskinn, ljósaperur (já, fleiri!) og rúmfatnað handa eldri dótturinni.  Hún á víst afmæli á morgun stúlkukindin, sweet sixteen og allt það.  Myndarleg ung kona og mér finnst ótrúlega stutt síðan hún náði ekki með nefið upp á stofuborðið!

Farin að finna mér eitthvað gott að hlusta á.  Hafið það gott.

Athugasemdir

[Dísa Dóra, 16.3.2008 kl. 22:39]

Til hamingju með dóttur þína þó enn sé rúmur klukkutími í afmælið þegar þetta er ritað

[Ólafur fannberg, 17.3.2008 kl. 12:20]

síðbúnar afmæliskveðjur.

[Þórdís Guðmundsdóttir, 17.3.2008 kl. 16:02]

Takk fyrir góðar kveðjur fyrir hönd Valgerðar! Reyndar skilst mér að hún hafi nú líka tekið á móti einni í eigin persónu!

[Garún (IP-tala skráð) 17.3.2008 kl. 23:15]

Til hamingju með litlu rófuna sem er ekki ennþá svo lítil. Það er eins og það hafi verið í gær að 9 marka barnið fæddist:)

Kveðja,

Garún