Ýmis tímamót

Í dag á afmæli fröken Stefanía Helga og myndi vera orðin tvítug!  Til hamingju með afmælið!
Í gær átti svo hann Mummi afmæli og við erum að fara að borða á Víðivöllum í kvöld af því tilefni.  Sú heimsókn þjónar líka þeim tilgangi að Valgerður hitti föðurfólkið sitt því hún er alltaf að vinna þegar við förum í laugardagsmatinn til ömmu hennar.

Maddama Kristrún, daglega nefnd Kiddý, ein af mínu bestu vinkonum, varð fertug þann fyrsta september.  Hún var að sóla sig á Mallorku á afmælisdaginn þannig að ég ætla að fara að gera mér ferð í Hafnarfjörðinn til að gefa frúnni pakka!  

En ekki eru öll tímamót af sama toga þessa dagana.  Hún Kristín, mamma hans Helga, lést í síðustu viku og við vottum fjölskyldunni innilega samúð okkar.  Mætur og vænn maður tengdur vinnunni minni lést um daginn og ég var við jarðarför hans í síðustu viku.  

Af okkur er það að frétta að heimilisfaðirinn keppist við að grafa holur fyrir utan húsið og gengur allvel með verkið.  Við fórum svo á svokallaðan þjónustuteymisfund á vegum Kópavogsbæjar vegna hennar Huldu Ólafíu á miðvikudaginn.  Þar hittast allir þeir aðilar sem koma að uppfræðslu og aðbúnaði stúlkunnar á einn eða annan hátt svo þetta verða ansi stórir fundir.  En þetta var gríðarlega jákvæður fundur og meðal annars var stuðningur við stúlkuna aukinn um einn klukkutíma á dag, án þess að við bæðum um það.  Talsvert önnur saga en sumir foreldrar einhverfra barna í Reykjavík hafa verið að segja, en þau segja flest frá því að það þurfi að berjast með kjafti og klóm til að ná einhverjum framförum á þessu sviði.  Þannig að grínlaust, það er gott að búa í Kópavogi.

Mér finnst ég aðeins vera farin að ná andanum og hlutirnir smátt og smátt að verða viðráðanlegri.  Eitt er þó sem ég er í bölvuðum vandræðum með og þarf að fara að gera gangskör í.  Það er að grisja fatabunka fjölskyldunnar.  Úr sér gengin föt sem enginn notar lengur, stífla fataskápa og þvottahús heimilisins eins og illvíg hægðatregða og koma í veg fyrir að núverandi föt séu geymd og haldin á skikkanlegan hátt.  Það eru einhver ár síðan ég tók rassíu í þessu svo ég þarf að láta hendur standa fram úr ermum núna og láta Rauða Krossinn njóta þess sem hægt er.
En...þangað til næst, hafið það gott.

Athugasemdir

[Auður stóra systir og Co (IP-tala skráð) 18.9.2007 kl. 00:41]

Innilegar þakkir til ykkar allra fyrir hlýju og ást sem þið veittið okkur svo ríkulega í síðustu viku. Svo ekki sé talað um að koma í jarðarförina hjá tengdó. En húner jú búin að vera okkur samferða í næstum 40 ár. Við sendum ykkur koss og stórt knús á alla bæi. Við sjáumst svo um mánaðamót þegar við förum að jarðsetja krukkkun henna hjá Gesti. Við erum að hugsa um að gefa okkur 1-2 sólarhringa og fá að hitta ykkur almennilega. Við stillum strengi síðar í mánuðinu. Sérstaka kveðjur fá systurdæturnar mínar fyrir hlýja og notalega viðveru. Guð blessi ykkur öll í ljúfri bæn eins og frændi okkar fótalausi presturinn bað svo fölskvalaust.

[´Guðrún Björk (IP-tala skráð) 24.9.2007 kl. 11:17]

Það verður gaman að hitta ykkur almennilega þegar þið komið næst í bæinn:) þið látið okkur vita þegar nær dregur þannig að hægt verður að skipuleggja eitthvað huggulegt og næsos:)

Kveðja,

Guðrún Björk