Játningar línperrans

Restar af kvefi ennþá að hrjá mannskapinn.  Reyndar með ólíkindum hvað vikan líður hratt, mér finnst eins og það hafi verið mánudagur í gær.

Það hefur verið algjört bíó að fylgjast með hlerunar og samsæriskenningum og ég held að ég þurfi ekki að bæta neinu við þá revíu sem er í gangi þar.  Sýnist að bryddað verði upp á mörgum försum í vetur, svona í aðdraganda kosninganna.  Ég var að hugleiða í alvöru hvort maður ætti að hvíla Moggann á meðan á þessu stæði en það er hálftilgangslaust þar sem önnur blöð gubbast hvort sem er linnulaust inn um lúguna.  Maður er orðinn fastagestur í grenndargámunum, í örvæntingu að henda öllu blaðaflóðinu.

Svo er hin óskiljanlega ákvörðun að hefja hvalveiðar aftur, einhvern veginn hefur maður það á tilfinningunni að þarna sé bara verið að hygla einhverjum kallskröttum sem hafa verið að pússa skutlana í tuttugu ár.  Persónulega finnst mér hvalkjöt óþverri og mér finnst þessi ákvörðun skemmandi fyrir landið okkar. 

Svo komst ég að því að ég er svokallaður línperri.  Það er nefnilega einstök nautn að strauja hvítu bómullarrúmfötin mín með heklaða milliverkinu og fara svo og sofa í þeim.  Tekur óratíma en alveg þess virði.  Ég er í fúlustu alvöru að hugleiða að fara í L'Occitane og kaupa svona línvatn sem maður steinkar þvottinn með svo rúmfötin fái huggulega lykt í leiðinni.  En það dugar ekki að gera svona við gömlu druslurnar sínar.  Nei, þetta verða að vera alvöru rúmföt.  Öðruvísi mér áður brá því ég er yfirlýstur andstraujari.  Svo bregðast krosstré sem önnur....

En á morgun er útskrift Meistara Guðrúnar og við mætum að sjálfsögðu, galhress, í okkar fínasta pússi og með pakka í sveittum litlum lófunum.

Athugasemdir

[Birna M, 20.10.2006 kl. 21:08]

Hehh marr verður að leyfa sér smáperraskap stökusinnum. Sjálf fékk ég mér svona voðafínt steinkvatn til að setja í skápana mína.

[Þórdís Guðmundsdóttir, 21.10.2006 kl. 23:17]

Ekki slæm hugmynd! Ég var ekki búin að leiða línfantasíurnar svona langt!

[Hulda Katrín (IP-tala skráð) 22.10.2006 kl. 19:34]

Hrein rúmföt, hrein náttföt og nýkomin úr sturtu er bara toppurinn!

[Hulda Katrín (IP-tala skráð) 24.10.2006 kl. 23:55]

Ég held að ég þarf að fara í heimsókn til L´Occitane! Það er alltaf svona annar manna lykt í íbúðinni minni! Annað hvort þarf ég að fá mér einhverjar góða lykt eða kerti,,eða hanga eitthvað meira í íbúðinni!

[Auður stóra systir (IP-tala skráð) 27.10.2006 kl. 12:33]

Ég skil þetta mjög vel en í mínu tilfelli þarf að vera silkidamask í rúmfötunum. Annars strauja ég helst aldrei. Fékk eiginlega upp fyrir haus þegar ég var látin strauja vasaklútana hans pabba auk viskustykkja og ýmissa smáhluta. Ég var viss um að pabbi ætti fleiri en 100 vasaklúta en það getur verið misminni. En margir voru þeir!

[Hulda Katrín (IP-tala skráð) 2.11.2006 kl. 14:53]

Bara láta þig vita af því að ég hef fjárfest í Línvatni! Verbana Style! Gluggatjöldin og sófin fengu ágæta yfirferð til þess að fá góðan ilm í íbúðina! Svona vatn kostar 980 kr!