Skrítinn dagur

Hluti af barnæskunni, unglingsárunum og fullorðinsárunum hvarf í dag þegar brann í miðbænum.  Mikil eftirsjá af þessum húsum.  Í þessum húsum eignaðist ég "skvísuföt" 13 ára, keypti ófáar plötur, borðaði í fyrsta sinn á ævinni nautasteik "bleu", verslaði ditten og datten í litlu bókabúðinni sem var þarna og fyrir utan að heimsækja stöku sinnum þá skemmtistaði sem voru þarna.  Reyndar hefði verið kominn tími á að gera þessi hús myndarlega upp, svona á svipaðan hátt og hefur verið gert í Aðalstræti en við vonum bara að fólk hafi söguna í heiðri þegar endurbyggingin hefst.

Í öðrum fréttum þá eignaðist stórfjölskyldan bíl í dag.  Samsorta hinum gamla en nýrri árgerð, kraftmeiri og plássmeiri.  Fyrir þá sem ekki vita, þá gerðist það í byrjun mánaðar að klesst var aftan á okkur þar sem við vorum kyrrstæð á ljósum, okkar bíll kastaðist á næsta bíl fyrir framan og við urðum áleggið í samloku tveggja jeppa.  Gamli bíllinn var talinn of laskaður og aldurhniginn til að það borgaði sig að gera við hann svo hann var greiddur út.  Hvorug dætranna var með og við getum verið þakklát fyrir það en við sjálf fengum hinn hefðbundna hálshnykk og eymsli eftir öryggisbelti.  En nýji bíllinn er snotur, svo mikið er víst.

Svo skrapp Valgerður í Debenhams og keypti sér flík.  Kvaðst hafa gert kostakaup því viðkomandi plagg var á niðursettu verði, átti að kosta 4.690 kr. en fékkst á 1.300,-  Þegar ég fór að skoða miðana sá ég að þetta var merkt sem skemmd vara - á ensku - og stóð að saumspretta væri á flíkinni og ætti að gefa 10% afslátt - á ensku.  Saumsprettan var þarna, dóttirin lagaði hana, en mergurinn málsins er sá að þessi vara var aldrei í almennri sölu í búðinni.  Hún er flutt inn sem útsöluvara og seld sem slík.  Þannig að íslenska "upprunalega" verðmerkingin hefur aldrei átt við rök að styðjast.  Ég hafði nefnileg nokkrum sinnum velt fyrir mér að maður sá stundum kynlegar flíkur í búðinni sem ég hafði ekki séð í sölu fyrir útsölu.  Einhvern veginn hélt ég að nóg væri til af útsöludóti hérna án þess að það væri flutt sérstaklega inn? 

Ég man eftir að í "Men in Black" þá æpir einn ofurákafur drengur: "We're the best of the best of the best. SIR!"  Við getum þá sagt: "We get the rest of the rest of the rest.  SIR!"

Athugasemdir

[Auður og Helgi í Sri Lanka (IP-tala skráð) 19.4.2007 kl. 08:04]

Til hamingju með nýja bílinn. Er þetta Rav eða fólksbíll?

Já það er erfitt að horfa eftir húsunum í miðbænum. Stór hluti lífsins fór fram í miðbænum og því þessi hús hluti af þeim. Það er huggun harmi gegn, að nú ætla þeir að flytja Zimsen hálfa leið aftur inn í miðbæinn eða í grófina.

Ástarkveðjur til dætranna og ykkar sjálfra frá Suður Asíu

[Garún (IP-tala skráð) 19.4.2007 kl. 11:24]

Til hamingju með nýju drossíuna, hlakka til að berja hana augum. Ég er sammála með þessi blessuðu hús en ég held að með uppbyggingu á þessu horni ætti að taka fyrsta skrefið í að efla miðbæinn. Alls staðar annars staðar í heiminum eru miðbæir þar sem er líf og fjör, skemmtilegar verslanir og veitingastaðir. Það vantar svo sem ekki hér en þegar maður röltir um miðbæinn hér þá sér maður fleiri róna en fólk sem vill njóta miðbæjarins öðruvísi en kóffullt.

Kveðja,

Guðrún Björk